भैंसीबाट वाम नेतृहरुको देउवालाई सन्देश, ‘कम्युनिष्टको बुई चढेर पटक पटक प्रधानमन्त्री हुने तिम्रा दिन अब सकिए’
काठमाडौं ३ मंसिर
वाम गठबन्धन दलका नेतृहरुले प्रधानमन्त्री समेत रहेका नेपाली कांग्रेस सभापति शेरबहादुर देउवालाई वामपन्थीको बुई चढेर पटक पटक प्रधानमन्त्री हुने दिन सकिएको बताएका छन् ।
ललितपुर २५ वडाका नेकपा एमाले र नेकपा एमाले निकट महिलाहरुले संयुक्त रुपमा निकालेको र्यालीपछि आयोजित कोणसभामा बोल्ने महिला नेतृहरुले अहिलेसम्म झुक्याउँदै पटक पटक प्रधानमन्त्री बनेको र अब कम्युनिष्ट नझुक्किने भएकाले कम्युनिष्टको बुई चढेर प्रधानमन्त्री बन्ने सपना नदेख्न समेत चेतावनी दिए ।
उनीहरुले महिला उठीसकेपछि लक्ष्य पूरा गर्ने भन्दै ललिपतुर तीनमा प्रतिनिधितर्फ पम्फा भुसाल र प्रदेशसभातर्फ जिवन खड्काको जित भईसकेको र औपचारिक घोषणा हुन मात्र बाँकी रहेको समेत बताए ।
कोणसभामा माया केसी, सुसिला नेपाल, सुष्मा बोगटी, भगवती विष्ट लगायतले मन्तव्य राखेका थिए ।
माओवादी नेतृ तथा ललितपुर तीनकी उम्मेदवार पम्फा भुसालले र्यालीको उदघाटनमा मन्तव्य राखे पनि समापनमा भने व्यवस्ताका कारण उपस्थित हुन सकिनन् ।
उदघाटनका क्रममा उनले यो वाम तालमेल चुनावपछि स्थायी सरकार बनाउन र देशलाई समृद्ध र समुन्नत बनाउन रहेको बताएकी थिइन् ।
कोणसभा समापनका प्रमुख अतिथि एमाले नेता रघु पन्तले वाम उम्मेदवारलाई जिताउन आग्रह गरेका थिए ।
प्रकाशित मिति:
November 19, 2017
