असोज २३ - दुबईमा जारी एसीसी एलिट कप अन्तर्गत चौथो खेलमा आज नेपालले १ सय २५ रनले हङकङलाई पराजित गरेको छ ।
समूह चरणको अन्तिम खेलमा जित हात पार्दै नेपाल सेमिफाइनल प्रवेश गर्न पनि सफल भएको छ । अब नेपालले भोलि सेमिफाइनलको खेल अन्तर्गत मलेसियाको सामना गर्ने छ ।
दुबईको ग्लोबल क्रिकेट एकेडेमीमा भएको आजको खेलमा नेपालले हङकङलाई २२६ रनको चुनौती पेस गरेको थियो । उक्त रन जोड्न नेपाललाई निर्धारित ५० ओभरको खेलमा ७ विकेट गुमाउन परेको थियो ।
टस जितेर पहिलो ब्याटिङ रोजेको नेपालका तर्फबाट कप्तान पारस खड्काले ६१ रनको योगदान बनाएका थिए । त्यस्तै नेपालको सफलताका लागि अनिल कुमार मन्डलले ३७ जोडे भने वसन्त रेग्मीले ३१ रनको योगदान दिए ।
आजको खेलमा नेपालले हङकङलाई जसरी पनि पराजित गर्नैपर्ने बाध्यता रहेको थियो ।
हङकङलाई सस्तैमा प्याक गर्नका लागि नेपालका अनिल भट्टराई र बसन्त रेग्मीले ३/३ समान विकेट झारेका थिए भने पारस खड्काले २ विकेट र शक्ति गौचनले २ विकेट लिएका थिए ।
