कार्यदललाई तत्काल काम अगाडी बढाउन ओली र दाहालको निर्देशन

पौष २७, काठमाडौँ

नेकपा एमालेका अध्यक्ष केपी शर्मा ओलीको निवास  बालकोटमा बसेको एमाले र नेकपा माओवादी केन्द्रको संयुक्त कार्यदलको बैठक सम्पन्न भएको छ । मंगलबार गठन भएको कार्यदलको सदस्यसहितको सहभागितामा  आयोजित वैठकमा नेकपा (एमाले)का अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालले दुई दलले मंगलबार गठन गरेको कार्यदललाई तत्काल काम शुरु गर्न निर्देशन दिएका छन् ।

दुई पार्टीका अध्यक्षले कार्यदललाई काम शुरु गर्न निर्देशन दिएको एमालेका नेता एवं कार्यदलका सदस्य शंकर पोखरेलले सञ्चारकर्मीलाई जानकारी दिएका हुन् । प्रदेशसभा गठनका सन्दर्भमा निर्वाचनमा प्राप्त गरेको मतभारलाई आधार मान्दै एकताको भावनाले काम गर्ने निर्देशन दिएको उनले जानकारी दिए। छलफलपछि कार्यदलका सदस्य बाहिरिएपछि एमाले अध्यक्ष ओली र माओवादी केन्द्रका अध्यक्ष दाहालबीच छलफल जारी रहेको छ ।
बैठकमा एमाले अध्यक्ष ओली, माओवादी अध्यक्ष पुष्पकमल दाहाल प्रचण्ड, एमाले नेता सुवास नेम्वाङ, ईश्वर पोखरेल र शंकर पोखरेलसँगै माओवादी नेता वर्षामान पुन र रामबहादुर थापा ‘बादल’ सहभागी छन् । बैठकमा कार्यदलका सदस्यद्वय मातृका यादव र सुरेन्द्र पाण्डे उपत्यका बाहिर रहेकाले बैठकमा उपस्थित भएका छैनन् ।