छात्रावासबाटै तीन बालबालिका गायब, हप्तादिनसम्म अवस्था अज्ञात I
असार ६ – सप्तरीको एक छात्रवासमा बस्दै आएका तीन जना विद्यार्थी विगत एक साता बेपत्ता भएका छन् ।
राजविराज–९ स्थित लिटिल फ्लावर माध्यमिक विद्यालयको छात्रावासमा बस्दै आएका कक्षा ७ मा पढिरहेका को बर्साइन–२ निवासी १४ वर्षीय विजयविक्रम शर्मा, कक्षा ८ मा अध्ययनरत अर्नाहा–८ निवासी १३ वर्षीय सतीशचन्द्र साह र कक्षा ८ मा पढिरहेका सकरपुरा–९ निवासी १५ वर्षीय आकाश साह गत जेठ ३१ गते राति १० बजेदेखि हराएको र उनीहरुको अहिले पनि अवस्था अज्ञात रहेको हो ।
अन्य विद्यार्थी टेलिभिजन हेरिरहेको मौका छोपी साथीहरुको बाकसबाट पैसा निकालेर आफ्नो समानसहित उनीहरु छात्रावास भवनको छतबाट हाम्फालेर भागेको विद्यालयका प्राचार्य नन्दलाल आचार्यको भनाई छ ।
उनीहरुको सबैतिर खोजी गर्दा फेला नपरेपछि विद्यालय र आफन्तले जिल्ला प्रहरी कार्यालय सप्तरीमा उजुरी दिएका छन् ।
उनीहरुले छात्रावासमा सँगै बस्दै आएका साथीहरु विजय मण्डलको बाकसबाट रु चार हजार २८०, हेमनारायण पण्डितको बाकसबाट रु ६७० र रुपेश मण्डलको रु १६० लिएर भागेको विद्यार्थीले बताएको जनाइए पनि अहिलेसम्म उनीहरु कहाँ गए भन्नेसम्म पत्ता लाग्न सकेको छैन ।
प्रकाशित मिति:
June 20, 2012
