क्रिकेट अन्तर्राष्ट्रिय जगतमै नेपालको ऐतिहासिक जित
आईसीसी वर्ल्ड क्रिकेट अन्तर्गत आजको खेलमा पनि डेनमार्कलाई पाखा लगाउँदै नेपालले आईसीसी वर्ल्ड क्रिकेक डिभिजन थ्रीमा प्रवेश गर्न सफल भएको छ ।
अब नेपालले फाइनलमा अमेरिकासँग भिड्ने भएको छ । पानी परेर ओभर घटाइएको खेलमा नेपालले डेनमार्कलाई डकवर्थ लुइस अनुसार २५ रनले हराउँदै डिभिजन थ्रीको ढोका खोलेको हो ।
मलेसियाको किनरारा ओभलमा टस जितेर पहिलो ब्याटिङ राजेको नेपालले २४० रनको चुनौती लक्ष्य पेस गरेको थियो । उक्त रन जोड्न नेपालका अनिल मण्डलले सतक प्रहार गरेका थिए । खेलमा मण्डल एक्लैले ४ छक्का, ८ चौका प्रहार गर्दै १ सय १३ रन जोडेका थिए ।
त्यस्तै नेपालका लागि शरद भेषवाकरले २७, ज्ञानेन्द्र मल्लले २६, वसन्त रेग्मीले २१ रन जोड्न सफल भए भने त्यस्तै विनोद दाशले १५, प्रदीप ऐरीले ११ रन जोडेका छन् ।
जवाफी ब्याटिङका लागि मैदानमा उत्रिएको डेनमार्कलाई नेपालले सस्तैमा समेट्यो । डेनमार्कले ३ विकेटको क्षतिमा ७७ रन बनाउँदा भारी वर्षाले खेल केही सयम अवरुद्ध हुन पुगेको थियो ।
वर्षापछि ३१ ओभरमा छोट्याइएको खेलमा १ सय ५६ रन बनाउनु पर्ने लक्ष्य पाएकोमा डेनमार्कले ९ विकेटको क्षतिमा १ सय ३० रनमा मात्र जोड्न सक्यो ।
डेनमार्कलाई सस्तोमा समेट्न कप्तान पारस खड्काले २ विकेट पतन गराएका थिए भने बसन्त रेग्मी र संजम रेग्मीले २–२ र शक्ति गौचनले १ विकेट झारेका थिए ।
डिभिजन चोर अन्तर्गत अङ्क तालिकामा शीर्ष स्थानमा रहेको नेपाल र दोस्रो स्थानमा रहेको अमेरिका डिभिजन ३ मा बढुवा भएको हो ।
डिभिजन ३ मा इटाली, बर्मुदा, ओमान र युगान्डा रहेका छन् ।
पुछारमा रहेका दुई टिम तान्जानिया र मलेसिया रेलिगेसनमा परी डिभिजन ५ मा घटुवा भएका छन् ।
प्रकाशित मिति:
September 09, 2012
