माघ ३ – बढ्दो विद्युत कटौतीले जनजीवन प्रभावित हुँदासमेत सम्बन्धित निकायले कुनै चासो नदेखाएको भन्दै स्थानीयवासीले आज बिहानैदेखि पूर्व–पश्चिम राजमार्गअन्तर्गत सप्तरीको बरमझियामा चक्काजाम गरेका छन् ।
दैनिक १८ देखि २० घन्टासम्म विद्युत कटौती भइरहँदासमेत सम्बन्धित निकायले यसलाई नियन्त्रण गर्न कुनै पहल नगरेको भन्दै स्थानीयवासीले बिहान ७ बजेदेखि सो मार्गमा चक्काजाम गरेका हुन् ।
चक्काजामका कारण पूर्व र पश्चिमबाट आएका सयाँै सवारी साधन बीचबाटोमै रोकिएका छन् भने यात्रुहरु अलपत्र परेका छन् ।
विद्युत कटौतीको समय घटाएर नियमित विद्युत् आपूर्तिको व्यवस्था नमिलाएसम्म आन्दोलन जारी राख्ने उनीहरुले बताएका छन् ।
यस्तै अचानक सप्तरीमा १८ देखि २० घन्टासम्म विद्युत कटौती हुन थालेपछि सप्तरी सदरमुकाम राजविराजसहित ग्रामीण भेगको जनजीवन प्रभावित भएको छ ।
गहुँबाली लगाउने बेलामा विद्युत् कटौती गरेपछि कृषक बढी मारमा परेका छन् ।
भारतले दिँदै आएको विद्युत् सेवा बन्द गरेपछि जिल्लामा विद्युत कटौती गर्नु परेको नेपाल विद्युत् प्राधिकरण राजविराज शाखाका प्रमुख शम्भु कुसियैतले जानकारी दिए ।
