पुस १८ – कैलाली भन्सार नाका हुँदै भारतको मुम्बई जान लागेकी एक युवतीलाई उद्धार गरिएको छ ।
मुडा गाविस–६ निवासी २० वर्षीया ती युवतीलाई शान्ति पुनस्र्थापना गृहले सोमबार सांँझ करिब ६ बजे कैलाली भन्सार नाकाबाट उद्धार गरी मंगलबार परिवारको जिम्मा लगाएको हो ।
लुगाकपडा बोकेर एक्लै भारततर्फ जान लागेको अवस्थामा भेटिएपछि शान्ति पुनस्र्थापना गृहले उनलाई नियन्त्रणमा लिएको थियो ।
तुरुन्त ती युवतीको घरमा टेलिफोन गरेर सोधपुछ गर्दा परिवारजनले रोकिदिन आग्रह गरेपछि उनलाई आज बिहान प्रहरीको रोहवरमा परिवारको जिम्मा लगाइएको शान्ति पुनस्र्थापना गृहका कार्यक्रम संयोजक वासुदेव भट्टराईले बताए ।
हिजोआज महिला सामान्य घर विवाद भएपछि घरबाट निस्किएर भारततर्फ जाने र भारतमा पुगेपछि विभिन्न शोषणमा पर्ने क्रम बढेकाले यसरी एक्लै भारत जान लागेको भेटेमा परिवारलाई सोधपुछ गरेर मात्रै छोड्ने गरेको उनले बताए ।
विसं. २०६५ देखि हालसम्म १२२ जना महिला तथा किशोरीलाई यसरी जोखिमपूर्ण अवस्थामा भारतलगायत अन्य खाडी मुलुक जाँदै गर्दा उद्धार गरिएको संस्थाले जनाएको छ । रासस
