माघ ५ - कैलालीमा आज चट्याङ लागेर एक जनाको ज्यान गएको छ ।
गएरातिदेखि भएको वर्षासँगै परेको चट्याङ लागेर कैलालीको टीकापुरमा एक महिलाको मृत्यु भएको हो ।
टीकापुर नगरापालिका–९ एकतापुर शिविरकी ३५ वर्षीया भृकुली विकको गएराति करिब २ बजे चट्याङ लागेर मृत्यु भएको जिल्ला प्रहरी कार्यालय कैलालीले जनाएको छ ।
चट्याङ लागेर उनका चार वर्षीय छोरा दीपक विक घाइते भएका छन् । उनको टीकापुर अस्पतालमा उपचार भइरहेको छ ।
चट्याङले उनको घरमा समेत क्षति पुगेको छ । गएरातिदेखि त्यसक्षेत्रमा वर्षा भइरहेको छ । जल तथा मौसम विज्ञान विभाग फिल्ड कार्यालय अत्तरियाका अनुसार गएरातिदेखि आज बिहान ८:३० बजेसम्म कैलालीमा २०.३ मिलिलिटर वर्षा भएको छ ।
वर्षाले गहुँ र मुसुरोलाई फाइदा पुगेपनि भित्र्याउन लागिएको तोरीमा क्षति पुगेको कृषि कार्यालय धनगढीका प्रमुख खगेन्द्र शर्माले बताएका छन् ।
