पुस १८ – नेकपा माओवादीका अध्यक्ष मोहन वैद्य किरणले बाबुराम नेतृत्वको अहिलेको सरकार एक नम्बर कठपुतली भएको बताएका छन् ।
राजधानीस्थित पार्टी कार्यालय बुद्धनगरमा सञ्चार राज्य र साँस्कृतिक राज्यको आज संयुक्त अधिवेशनको उदघाटन गर्दै उनले अहिलेसम्म बनेका सबै सरकार कठपुतली भएको र त्यसमा सबैभन्दा बढी कठपुतली बाबुरामकै सरकार भएको बताए ।
कार्यक्रममा उनले उत्पिडित वर्गको उत्थान तथा राष्ट्रियता, जनजीविका, जनसंविधानका लागि आफूहरु जे गर्न पनि पछि नपर्ने जनाए ।
उनले अहिले साम्राज्यवादी तथा विस्तारवादीहरु सेना लिएर भन्दा पनि उनीहरुद्वारा सञ्चालित एजेन्ट तथा दलालबाट आफ्नो फाइदा लिईरहेको भन्दै त्यसतर्फ पनि सचेत हुन आग्रह गरे ।
सो कार्यक्रममा उनले देशभक्त सबै एकजुट हुनुपर्ने बेला आएको भन्दै गणतन्त्रणको नारामा राजा पञ्चेहरु आए भने पनि गणतन्त्र स्थापनाका लागि सँगै लड्न तयार रहेको बताए ।
वैद्यले विश्वका धेरै मुलुकमा संविधानसभाबाट संविधान बनेको भएपनि संविधानसभाबाट कहीँ पनि क्रान्ति सम्पन्न नभएको पनि उल्लेख गरे ।
