सबै दललाई निर्वाचनमा सहभागी गराउनु पर्छ : राष्ट्रपति
वैशाख ९ - राष्ट्रपति डा. रामवरण यादवले निर्वाचनको विकल्प नभएकाले सबै राजनीतिक दललाई निर्वाचनमा सामेल गराउनु पर्ने बताएका छन् ।केही दिन बस्ने गरी सोमबार दिउसो आफ्नो गृहजिल्ला धनुषा पुगेका यादवले निर्वाचनको विकल्प नभएकाले सबैलाई निर्वाचनमा सहभागी गराएर संविधानसभाको निर्वाचनमार्फत राजनीतिक संकटको समाधान गर्नुपर्ने बताएका हुन् ।
धनुषको सपहीमा रहेको आफ्नो पुख्यौँली घरमा पुगेका यादवले स्थानीय नेता, कार्यकर्ता र सञ्चारकर्मीसँग भने ‘संविधान र लोकतन्त्रकालागि संविधानसभाको निर्वाचन आवश्यक छ । सबै दल मिलेर निर्वाचनलाई सफल बनाउनु पर्छ ।’
यादवले आगमी निर्वाचनमा सबै दललाई समेटेर अगाडि बढ्न प्रमुख राजनीतिक दललाई आग्रह समेत गरेका छन् । निर्वाचनका लागि आफूले जस्तोसुकै सहयोग गर्ने भन्दै यादवले सरकार समेत निर्वाचन गराउनका लागि तत्पर भएको बताए । सोमबार राष्ट्रपति यादव काठमाडौँबाट सेनाको हेलिकप्टर मार्फत महेन्द्र हुँदै महेन्द्रनगर देखि ७ किलोमिटर बाटो मोटरमा गुडेर आफ्नो पुख्र्यौली घर सपही पुगेका हुन् ।
प्रकाशित मिति:
April 22, 2013
