रुकुम, २३ चैत (रासस) - मग्मा गाविसमा ट्र्याक्टर दुर्घटना हुँदा चार जनाको मृत्यु भएको छ भने ३ जना गम्भीर घाइते भएका छन् ।

लु२त ९९४७ नम्बरको ट्र्याक्टर पल्टँदा घटनास्थलमै तीन जनाको र उपचारको लागि ल्याउँदै गर्दा बाटोमै थप एक जनाको मृत्यु भएको जानकारी प्रहरीले दिएको छ ।

उक्त दुर्घटनामा परी मग्मा–१ का ३५ वर्षीय रामबहादुर खत्री, मग्मा –९ का ४० वर्षीय काशीराम खनाल, मग्मा– ९ कै ५५ वर्षीय कविराम खनालको घटनास्थलमै मृत्यु भएको थियो भने मग्मा– २ का ४२ वर्षीय सर्जन खत्रीको उपचारको लागि सदरमुकामतर्फ ल्याउँदै गर्दा बाटोमै मृत्यु भएको जिल्ला प्रहरी कार्यालयले बताएको छ ।

दुर्घटनामा परी मग्मा– ६ का ३५ वर्षीय मनवीर खत्री, मग्मा– ४ का ३२ वर्षीय धनबहादुर पुन र मग्मा– ९ का २२ वर्षीय हरिबहादुर खनाल गम्भीर घाइते भएका छन् ।
घाइते सबैलाई गाउँमै प्राथमिक उपचारपछि थप उपचारको लागि जिल्ला असपत्ताल सल्ले ल्याइएको छ । आठविसकोट गाविसको राडिबजारबाट झुला गाविसको गाँराघाट बजार आउँदै गरेको ट्र्याक्टर हिजो साँझ दुर्घटनामा परेको हो ।

दुर्घटनापछि ट्र्याक्टरका चालक र सह–चालक फरार भएका छन् । ब्रेक फेल भएर दुर्घटना भएको भनिए पनि चालकले मदिरापान गरेको आरोप लगाइएको छ । चालक र सह–चालकबाहेक ट्र्याक्टरमा ९ जना सर्वसाधारण चढेका थिए ।

यसमा तपाईको प्रतिक्रिया