कांग्रेसको विवाद उस्तै, संसदीय दलको नेता छान्न समिति गठन

माघ ५ । निर्वाचनपछि पहिलो ठूलो दल बनेको नेपाली कांग्रेसभित्रको विवाद साम्य हुन सकेको छैन ।

संसदीय दलको नेता प्रधानमन्त्री हुने कांग्रेसको व्यवस्था अनुसार उक्त पदमा सबैको महत्वकांक्षी बढेर गएपछि विवाद मिल्न नसकेको हो । विवाद मिलाउन कांग्रेसले संसदीय दलको नेता चयनका लागि निर्वाचन समिति गठन समेत गरेको छ ।

 पार्टी केन्द्रीय कार्यालय सानेपामा शनिबार बसेको कांग्रेस केन्द्रीय समिति बैठकले पार्टी प्रवक्ता दिलेन्द्र बडुको संयोजकत्वमा तीन सदस्यीय निर्वाचन समिति गठन गरेको हो ।

सभापति सुशील कोइराला, वरिष्ठ नेता शेरबहादुर देउवा र उपसभापति रामचन्द्र पौडेल दलको नेताका लागि आकांक्षी छन् । तीन नेताबीच पटक–पटक वार्ता भएपनि सहमति बनिसकेको छैन ।