पाकिस्तानको जेलमा एक नाम नखुलेका नेपाली रहेको खुलासा

जेठ १२ । पाकिस्तानस्थित नारा जेलमा एक नाम खुल्न नसकेका नेपाली रहेको खुलासा भएको छ ।

उक्त जेलमा रहेका १५१ जना भारतीय माझीहरु रिहा गर्ने क्रममा एक रिहा भएका भारतीयले यसको खुलासा गरिदिएका हुन् ।

पाकिस्तानका प्रधानमन्त्री नवाज सरिफले भारतका नव नियुक्त प्रधानमन्त्री नरेन्द्र मोदीको सपथ ग्रहण कार्यक्रममा सहभागी हुन आउनु अघि उनीहरुलाई रिहा गर्न आदेश दिएका थिए । रिहा हुने क्रममा नरेश नामका एक भारतीयले पाकिस्तानी पत्रिका ‘डन’सित कुरा गर्दै जेलमा एक नेपाली रहेको खुलासा गरिदिएका हुन् ।

तर, ती नेपालीको नाम के हो र कसरी जेलमा पुगे भन्नेबारे भने अहिलेसम्म खुल्न सकेको छैन । उनका आफन्तलाई समेत यो विषयमा खबर भएको या नभएकोबारे खुल्न सकेको छैन ।

ती भारतीय व्यक्तिले भनेका छन् ‘मैले तपाईँलाई एउटा के कुरा सुनाउनै पर्छ भने कसैले नेपालको उच्चायुक्तलाई गएर सूचित गराइदिनुस् कि एक नेपाली नागरिक पनि नारा जेलमा कोचिएर दिन बिताइरहेका छन्, ।’

पाकिस्तानी प्रधानमन्त्रीको निर्देशनपछि ती १५१ जना भारतीय माझी रिहा भएपनि भारतीय भएको पहिचान खुल्न नसक्दा ती नेपाली भने रिहा हुन नसकेका हुन् ।