लगातार छैटौं पटक पनि संसद बैठक रोकियो

काठमाडौँ, २६ जेठ । व्यवस्थापिका–संसद्को बैठक लगातार छैटौं पटक पनि अवरुद्ध भएको छ । सोमबार बसेको दोस्रो बैठक समेत प्रतिपक्षी दलहरूको अवरोधका कारण सुचारु हुन सकेन ।

संसदको दोस्रो बैठक सुरु हुने वित्तिकै एकीकृत नेकपा(माओवादी)का सभासद् सुरेन्द्र कार्कीले सरकारले प्रतिपक्षको आवाजलाई सम्बोधन नगरेको र सामान्यभन्दा सामान्य माग पनि पूरा गर्न तत्पर नभएका कारण संदनको कारबाही अगाडि बढ्न नसक्ने बताए ।

साँझ दोस्रोपटक बसेको बैठकमा सभामुखसँग समय लिएर बोल्दै कार्कीले प्रतिपक्षलाई पेलेर जाने मानसिकतामा सरकार रहेका कारण सहमति हुन नसकेको उनको धारणा थियो ।

सभामुख सुवास नेम्वाङले सधै सदनको कारवाही अवरोध हुनु राम्रो नभएको भन्दै तत्काल सदन सञ्चालनको वातावरण बनाउन सरकार र विपक्षी दललाई आग्रह गरेका थिए ।

प्रतिपक्ष दलले उठाएको माग सम्बोधन गर्न सरकार तत्पर नभएका कारण सदनको कारबाही अगाडि बढ्न नसक्ने बताएपछि सभामुख नेम्वाङले सदनको कारबाही अगाडि बढ्न नसक्ने भन्दै यही जेठ २८ गते बुधबार साँझ ५ बजेसम्मका लागि स्थगित भएको जानकारी गराएका थिए ।

सोमबार दिउँसो ३ बजे बसेको संसदको बैठक पनि प्रतिपक्षी दलकै अवरोधका कारण स्थगित भएको थियो ।

सोमबार बसेको पहिलो संसदको बैठक सुरु हुने वित्तिकै सङ्घीय समाजवादी पार्टीका सभासद् अशोककुमार राईले विपक्षी दलहरूले यही जेठ १६ गतेदेखि उठाएको विषयमा सरकार र सत्ता पक्षले कुनै पनि ध्यान नदिएका कारण आफूहरू बाध्य भएर सदन अवरोध गर्नुपर्ने अवस्थामा आएको बताएका थिए ।

गत मङ्सिरमा सम्पन्न संविधानसभा निर्वाचनमा भएको भनिएको धाँधली छानविनमा सरकार उदासिन रहेको, जथाभावी तवरले अर्थ र सङ्घीय मामिला तथा स्थानीय विकास मन्त्रालयले बजेट रकमान्तर गरेको तर सो विषयलाई सरकारले सदनलाई जानकारी नगराएको भन्दै उनले प्रतिपक्षी दलले उठाएको माग सम्बोधन नहुँदासम्म सदन चल्न नसक्ने तर्क गरेका थिए ।