मेगा बैंकको प्रतिसेयर आम्दानी खुम्चियो, प्रतिसेयर ५ रुपैयाँ ३४ पैसा मात्र
काठमाडौं १० माघ ।
मेगा बैंकले पूँजी वृद्धिको अनुपातमा आम्दानी बढाउदा नसक्दा प्रतिसेयर आम्दानी खुम्चिएको छ । बैंकले सार्वजनिक गरेको दोस्रो त्रैमासको वित्तीय विवरण अनुसार ८३ प्रतिशतले पूँजी बढ्दा बैंकको खुद कमाई ६ प्रतिशतले मात्र बढेको छ । यसो हुँदा बैंकको प्रतिसेयर आम्दानी ५ रुपैयाँ ३४ पैसा छ ।
आठ अर्ब चुक्ता पुँजी पुर्याउन बैंकले टुरजिम डेभलपमेन्ट बैंकलाई गाभ्ने प्रक्रियामा समेत छ ।
मेगा बैंकले चालु आर्थिक वर्षको पुष मसान्तमा ३९ करोड ३६ लाख ४९ हजार रुपैंया खुद नाफा कमाएको छ । गत आर्थिक वर्षको यसै अवधिमा बैंकले ३७ करोड ९ लाख ९ हजार रुपैंया खुद नाफा कमाएको थियो । बैंकको खुद नाफा गतबर्षको यसै अवधिको तुलनामा ६.१३ प्रतिशत बढी हो ।
बैंकको खुद ब्याज आम्दानी, संचालन मुनाफा तथा खराब कर्जा असुलीमा सुधार आएपछि नाफामा सामान्य बढोत्तरी देखिएको हो । बैंकको ब्याज खर्च, कर्मचारी खर्च तथा जोखिम वापतको व्यवस्थापन खर्च समेत बढ्न गएको छ ।
समीक्षा अवधिमा बैंकको चुक्ता पूँजी चार अर्ब एक करोड रुपैंयाबाट बढेर सात अर्ब ३७ करोड पुगेको छ । यसअवधिमा बैंकले चुक्तापूँजी ८३.८६ प्रतिशतले बढाएको छ । बैंकले ६५ प्रतिशत हकप्रद बिक्री गरेर पूँजी बढाएको हो । साथै बैंकले ९.४५ प्रतिशत बोनस सेयर समेत प्रस्ताव गरेको छ । बोनसपछि बैंकको पूँजी आठ अर्ब नाघ्नेछ ।
प्रकाशित मिति:
January 24, 2018