संविधानसभालाई हाइज्याक गरियो, अब बुढो साँढेलाई बाँधेर बहर लगाउनुपर्छ
पछिल्लो समय देशको निकास खोजिरहेको अवस्थामा राजधानीमा आज आयोजित एक कार्यक्रममा उनलाई प्रश्न गरिएको थियो कि अहिले राजनीतिक दलहरु भन्दा तेस्रो व्यक्ति प्रधानमन्त्री हुनुपर्छ भन्ने आवाजहरु पनि उठिरहेको छ । यो अवस्थामा तपाईलाई प्रधानमन्त्रीको प्रस्ताव गरेमा या त तपाई नै हुनुपर्छ भनेमा के गर्नुहुन्छ ? उनी हाँसे । सायद पत्यार नलागेर होला । अनि उल्टै भने तपाईले दिनुभएमा त हो नि ?
विद्यार्थी युवा पत्रकार समूहको साप्ताहिक अन्तरक्रिया कार्यक्रम अन्तर्गत ४२ औँ श्रृंखलाको लगभग अन्तिममा सोधिएको थियो यो प्रश्न । युवा पुस्तालाई अवसर नदिएको जस्ता उनका अन्य भनाईलाई लिएर हेर्ने हो भने पोखरेलका लागि प्रधानमन्त्री या त राष्ट्रपति बन्ने इच्छा छैन कि क्या हो भन्ने पनि हुन सक्छ । तर उनले थपेका थिए देशलाई संक्रमणबाट जोगाउन जसले जे सक्छ त्यो गर्नुपर्छ र म पनि त्यसका लागि तयार छु । अतः उनलाई पनि देशलाई संक्रमणबाट मुक्त गर भनेर जिम्मा दिएमा भने त्यो जिम्मेवारी पूरा गर्न उनी प्रतिवद्ध छन् भन्ने उनको भनाईबाट छचल्किन्थ्यो ।
३०/३५ जनाको संख्यामा पत्रकारिता अध्ययनरत विद्यार्थीहरु र केही पत्रकारहरुको सहभागिता रहेको सो कार्यक्रममा उनले मंसिर ७ गते कुनै पनि हालतमा संविधानसभाको निर्वाचन हुनै नसक्ने पनि बताए । पोखरेलले राजनीतिक आधार, कानुनी आधार र प्राविधिक आधार कुनै पनि तयार नभएकाले मंसिर ७ गते निर्वाचन हुनै नसक्ने उनले ठोकुवा गरे ।
रत्नराज्य लक्ष्मी क्याम्पस (आरआर) का विद्यार्थीहरुद्वारा हरेक शनिबार बिहान ७ बजेदेखि ९ बजेसम्म गरिने सो कार्यक्रममा पोखरेल विद्यार्थीहरुसँग निक्कै खुलेका थिए । अन्तरक्रियामा विद्यार्थीहरुले प्रश्न गरिरहँदा विभिन्न किसिमका प्रश्नहरु उनीमाथि जाई लाग्थे तर उनी सकर्तताका प्रश्नहरुको उत्तर दिने गर्थे ।
युवा विद्यार्थीहरु भएर पनि होला धेरैको प्रश्न संविधानसभा विघटन र अब के हुन्छ भन्नेमा नै केन्द्रित देखिन्थ्यो ।
सो क्रममा एक विद्यार्थीले प्रश्न गरिहाले- अबको निकास चाँही के हुन सक्छ त ? उनले विद्यार्थीहरुलाई गाउँमा पुर्याए अनि बुढो साढे र बहर गोरुको उदाहरण दिए । निक्कै रमाइलो उदाहरणिय शैलीमा उनको प्रतिक्रिया थियो कि– बुढो साढेले बहरलाई चान्स दिएन भने हामी जसरी बुढो साढेलाई बाध्छौँ अब यो देशमा पनि त्यसै गर्ने बेला आएको छ । यसो भनिरहँदा विद्यार्थीहरु बुझेर होस या त नबुझेर खुबै चासो देखाएर हेरिरहेका थिए । उनले अझै सो उदाहरणलाई स्पष्ट पार्न तिर लागे अनि उनले थपे अब यो देशमा युथ लिडरको आवश्यकता छ ।
देशको राजनीतिक अवस्था र संविधानको विषयमा अन्तरक्रिया गरिरहँदा विद्यार्थीहरुमा भने देशको वर्तमान अवस्थाले पिरोलिरहेको कुरा स्पष्टै देखिन्थ्यो । उनीहरु प्रश्न गर्दा त्यही पुगी जान्थे कि अब के हुन्छ त देशमा ।
सो क्रममा पूर्व गृह, सञ्चार, स्वास्थ्य सचिव लगायत रहेका उनले ४/५ जना पार्टीका नेताले संविधानसभालाई बन्धक बनाएको आक्रोश पोखे । उनले दलहरुसँग आ–आफ्ना एजेण्टा भएकोले त्यसलाई समायोजन गर्न दलहरु असफल भएकाले यो अवस्था आएको जनाए ।
उनको भनाई थियो– 'दलहरु जहिल्यै संविधानसभा भन्दा पनि कुर्सी र सत्तामा लागिरहे, प्रधानमन्त्री को हुने, कसलाई फाल्ने भन्नेमा उनीहरु केन्द्रित भए त्यही भएर संविधान नबनेको हो ।' उनले सोही क्रममा थपे प्रमुख दलले संविधानसभालाई हाइज्याक गरे । त्यसो त उनले दलहरु कमजोर र अव्यवस्थित रहेको पनि उल्लेख गरे । दलहरु कुनै पनि कुरामा पारदर्शी नै छैनन् उनको भनाई थियो ।
विद्यार्थीका माझ पोखरेलले दलहरुबीच सहमतिको आवश्यकतालाई पनि निक्कै जोड दिए । जुन सहमति रोडम्यापका लागि हुनुपर्ने भन्दै उनले उक्त रोडम्यापले संवैधानिक तवरबाट संविधान संशोधन गर्नुपर्ने पनि बताए ।
त्यसो त विद्यार्थीहरुमाझ उनले पोलिटिक्समा नजिक हुनुभन्दा पनि अलग हुनुमा जोड दिएको बुझ्न सकिन्थ्यो । त्यहाँ उनले एक प्रसंगमा भनेका थिए 'पोलिटिक्स बन्मराको झार हो उम्रिन केही बेर लाग्दैन अनि त्यसले जमिन बिगार्न पनि कुनै समय कुर्नुपर्दैन ।'
प्रकाशित मिति:
July 28, 2012
