असोज २२ – नेपाली काँग्रेसले एकीकृत नेकपा माओवादीलाई तत्काल विश्वास गर्न नसकिने निष्कर्ष निकालेको छ ।

असोज महिनाभित्रै राष्ट्रिय सहमतिको सरकार बनाउन एकीकृत नेकपा माओवादी इमान्दार नदेखिएको ठहर समेत कांग्रेसले गरेको छ ।

महाराजगञ्जस्थित सभापति सुशील कोइरालाको निवासमा आज बसेको पदाधिकारी र प्रभावशाली नेताहरूको बैठकले यस्तो ठहर गरेको हो ।

उक्त बैठकले माओवादीले पटक पटक छलकपट गर्दै विगतका सहमति कार्यान्वयन गर्न आनाकानी गरिरहेकाले तत्काल विश्वास गर्न नसकिने निष्कर्ष निकालेको हो ।

बैठकपछि काँग्रेस उपसभापति रामचन्द्र पौडेलले बैठकमा मुलुकलाई निकास दिने विषयमा गम्भीर छलफल भएको भन्दै मुलुकलाई राजनीतिक र संवैधानिक निकास दिन दलहरूबीच पछिल्लोपटक भएका सहमति कार्यान्वयन गर्न पहल गर्नुपर्ने बैठकले निष्कर्ष निकालेको बताए ।

यसमा तपाईको प्रतिक्रिया