वृद्धको उपचारका क्रममा मृत्यु
माघ , रासस – तनहुँको बन्दीपुर गाविस वडा नं ६ स्थित विमलनगरमा नम्बर नखुलेको एक सवारी साधनले सोमबार साँझ ठक्कर दिँदा घाइते भएका एक वृद्धको उपचारको क्रममा मृत्यु भएको छ ।
जिल्लाको आँवुखैरेनीबाट डुम्रेतर्फ जाँदै गरेको सवारी साधनले ठक्कर दिँदा सख्त घाइते भएका सोही वडा निवासी ७५ वर्षीय इन्द्रबहादुर थापाको सोमबार राति डुम्रेस्थित लक्ष्मी अस्पतालमा उपचारको क्रममा मृत्यु भएको हो ।
उक्त घटनापछि आक्रोसित स्थानीयवासीले पृथ्वीराजमार्ग अवरुद्ध गर्ने क्रममा प्रहरीसँग भएको झडपमा परी पाँच जना प्रहरीसमेत सामान्य घाइते भएका छन् । ठक्कर दिने सवारी साधनको खोजी कार्य तीव्र पारिए पनि नियन्त्रणमा लिन नसकिएको जिल्ला प्रहरी कार्यालयले जनाएको छ ।
प्रहरीले अनुसन्धानका क्रममा तीन वटा बस र एउटा ट्रकलाई नियन्त्रणमा लिएको बताएको छ ।
प्रकाशित मिति:
January 15, 2013
