पुस २३ – चिसोबाट कठ्याङ्गिएर महोत्तरीमा एकै गाउँका एकैसाथ दुई जनाको मृत्यु भएको छ ।

जिल्लाको सदरमुकाम जलेश्वरसँगै गाँसिएर रहेको बजराही गाउँमा गएराति कठ्याङ्गिएर स्थानीय ५५ वर्षीय रामअशेश्वर साह र ५० वर्षीया राजकुमारीदेवी मण्डलको मृत्यु भएको परिवारजनले जनाएका छन् ।

गएराति सुत्न गएका दुवै जना आज बिहान आ–आफ्नै घरमा मृत फेला परेका हुन् ।

चार दिनदेखि महोत्तरीको दक्षिणी भागमा पुनः जाडोको प्रकोप चलेको छ भने अविरलरूपमा चिसो हावा र शीतलहर चलिरहेको छ । साथै बाक्लो कुहिरो र हुस्सुले चारैतिर अँध्यारो छाएको छ ।

दुई साता लामो जाडोमा जिल्लामा १७ जनाको मृत्यु भएकामा पछिल्लो समयमा चार दिनमा तीनजनाको मृत्यु भई यस वर्ष महोत्तरीमा चिसोबाट मृत्यु हुनेको सङ्ख्या अहिलेसम्म २० जना पुगिसकेको छ ।

यसमा तपाईको प्रतिक्रिया