पुस १७ – अदालतले एकीकृत नेकपा माओवादीका नेता शालिग्राम जमरकट्टेलको हत्यासम्बन्धी उद्योगमा संलग्न चार अभियुक्तको मुद्दा फिर्ता लिने सरकारी निर्णय खारेज गर्न माग गर्दै दायर रिट निवेदनमा दिइएको अन्तरिम आदेशलाई पुनः निरन्तरता दिएको छ ।
न्यायाधीशद्वय कल्याण श्रेष्ठ र गिरीशचन्द्रलालको संयुक्त इजलासले यसअघि न्यायाधीश ताहिरअलि अन्सारीको एकल इजलासले मुद्दा फिर्ता लिने निर्णय हाललाई कार्यान्वयन नगर्न जारी गरेको सो आदेशलाई आज पुनः निरन्तरता दिएको हो ।
सरकारले गत जेठ ४ गते रिट निवेदक जमरकट्टेलका हत्यासम्बन्धी उद्योगमा संलग्न सुदीप कार्की, राम पुडासैनी, तारानिधि पन्तलगायत अभियुक्तको मुद्दा फिर्ता लिने निर्णय गरेपछि जमरकट्टेलले सो निर्णय बदर गराउन माग गर्दै अदालतमा रिट दायर गरेका थिए ।
सो रिटमा यसअघि जारी गरिएको अन्तरिम आदेश खारेज गर्न माग गर्दै सरकारका तर्फबाट पुनः अर्को निवेदन दर्ता भएको थियो ।
