यसरी गुम्दैछ चर्चित गायक रामकृष्ण ढकालको घर
बैशाख २१ । गायक रामकृष्ण ढकालको भैँसेपाटीस्थित कित्ता नम्बर ३८२ र ३८३ को ८७.४४.२००.७१ वर्गकिलोमिटर क्षेत्रफल जग्गा र त्यसमा बनेको घर लिलामीको लागि दैनिक पत्रिकामा सुचना सार्वजनिक भएसँगै घर लिलामीमा जाने सम्भावना बढेको छ ।बैंकबाट लिएको ऋण तिर्न आनाकानी गरेपछि लोकप्रिय गायक ढकालको घर लिलाम हुने भएको हो ।
अब उक्त सुचना सार्वजनिक भएको ३५ दिनभित्र ऋण चुक्ता नगरे उनको घर लिलाम हुने भएको हो ।
श्री लालीगुराँस बहुद्देश्यीय सहकारी संस्थाले ढकालको भैंसेपाटीस्थित घर लिलाम गर्न बिहीबार एक दैनिक पत्रिकामा ३५ दिने सूचना प्रकाशित गरेको छ ।
तर, यहाँ उनको घर लिलामीका लागि सूचना सार्वजनिक भए पनि गायक ढकाल भने अहिले युरोपमा छन् । उनी एक हप्ताअघि नै सांगीतिक कार्यक्रमका लागि बेल्जियम गएका हुन् । उनी त्यहाँबाट जर्मनी, होल्यान्ड र फ्रान्स जाने कार्यक्रम रहेकाले तीन महिनापछि मात्रै स्वदेश फर्कने कार्यक्रम भएको बुझिएको छ ।
तर, सहकारीले दिएको ३५ दिनको म्यादभित्र ऋण चुक्ता नगरे उनी फर्कदा घरजग्गा भने लिलाम भइसक्नेछ । सहकारीले जारी गरेको सूचनाअनुसार ऋण चुक्ता नगरे आगामी २३ जेठमा ढकालको घरजग्गा लिलाम गरिनेछ ।
गायक ढकाल अहिले देश बाहिर भए पनि उनकी श्रीमती तथा अन्य परिवार नेपालमै रहेकाले सहकारीको ऋण चुक्ता गरेको ठाउँमा भने उनको घर लिलाम हुनबाट बाँच्नेछ । एउटा चर्चित गायकले पैसा नभएरै ऋण नतिरेको हो कि या त भएर पनि तिर्न आनाकानी गरेको हो भन्नेबारे भने खुलेको छैन ।
ढकालले तीन वर्षअघि घरजग्गा धितो राखी लालीगुराँस बहुद्देश्यीय सहकारी संस्थाबाट आफ्नी पत्नी निलमका नाममा एक करोड ऋण लिएका थिए । सम्झौताबमोजिम समय–समयमा तिर्नुपर्ने साँवा, ब्याज, अतिरिक्त ब्याजलगायत अन्य दस्तुर तिर्न आनाकानी गरेपछि लिलामीको सूचना जारी गरिएको सहकारीको भनाई छ ।
ढकालको घरजग्गाको हालको मूल्य करिब दुई करोड बराबर हुन्छ । लालीगुराँसलाई तिर्नुपर्ने रकम भने डेढ करोड बराबरको मात्रै रहेको बताइएको छ ।
प्रकाशित मिति:
May 04, 2013
