संविधानसभाको पहिलो बैठककै दिन गेटमा कालो झण्डासहित प्रदर्शन हुने
काठमाडौं २ माघ । नेकपा–माओवादी नेतृत्वको ३३ दलीय राजनीतिक मोर्चाले संविधानसभाको पहिलो बैठकका दिन संविधानसभा भवन बाहिर विरोध प्रदर्शन गर्ने भएको छ ।माओवादी पार्टी कार्यालय बुद्धनगरमा बिहीबार मोर्चाको बैठक बसी संविधानसभा भवन अगाडी विरोध प्रदर्शन गर्ने निर्णय गरेको हो । उक्त दिन ३३ दलले डेढ घण्टा कालो झण्डा र ब्यानरसहित विरोध प्रदर्शन गर्न लागेका हुन् ।
यही माघ ८ गते कथित संविधानसभा–२ को विरोधमा “राष्ट्रघाती र जनघाती संविधानसभा–२ लाई अस्वीकार गरौं ! सर्वपक्षीय राजनीतिक गोलमेचसभाको आयोजना गरौं !!” भन्ने मूल नारासहित नया“ बानेश्वर स्थित संविधानसभा भवनको अगाडि दिनको २:०० देखि ३:३० बजेसम्म कालो झण्डा र कालो व्यानर सहित विरोध प्रदर्शन गर्ने निश्चित गरिएको छ’ बैठकपछि ३३ दलीय मोर्चाका तर्फबाट माओवादी सचिव देव गुरुङद्धार जारी विज्ञप्तिमा भनिएको छ ।
३३ दलीय मोर्चाले संविधानसभा भंग गरी सर्वदलीय बैठकमार्फत संविधान निर्माण लगायत विषयमा निकास निकाल्न माग गर्दै आएको छ । मोर्चाले मंसिरमा सम्पन्न संविधानसभाको चुनाव सक्रिय रुपमा बहिस्कार गरेको थियो ।
प्रकाशित मिति:
January 16, 2014
