अस्पतालबाटै बच्चा चोरिएका आमा बुबाको विचल्ली, अस्पतालमा खैलाबैला

माघ २ । बुटवलस्थित लुम्बिनी अञ्चल अस्पतालबाट एक नाबालाक शिशुको चोरी भएपछि आमा बुवाको विचल्ली भएको छ भने अस्पतालमा समेत यो विषयले खैलाबैला उत्पन्न भएको छ ।

आठ दिनको शिशु नाटकीय ढंगले हराएपछि आमा बुवा रणभुल्लमा परेका छन् । उनीहरुले प्रहरीलाई बच्चा खोजिदिन गुहार समेत गर्दै आएका छन् ।

कपिलवस्तु वीरपुर गाविस वडा नं. ६ कुँहरवेटवाकी ३२ वर्षीया राममती हरिजनको आठ दिनको शिशु अस्पतालबाटै चोरी भएको हो । शिशुलाई एक महिलाले लिएर भागेको आशंका गरिएपनि घटनाबारे सत्यतथ्य प्रहरीले समेत बाहिर ल्याउन सकेको छैन ।

बच्चा जन्माउँदा शल्यक्रिया गरेको स्थानमा लगाएको टाँका काट्न श्रीमान् परमात्मासँग अस्पताल पुगेकी राममतीले अपरिचित महिलालाई बच्चा समात्न दिएकी थिइन् ।

श्रीमान् शौचालय गएका बेला आफन्त जस्तो व्यवहार देखाएपछि अपरिचित महिलालाई बच्चा समाउन दिएको र उनी आफूलाई झुक्याएर गायब भएको राममतीले बताएकी छिन् । 

विवाह भएको १७ वर्षपछि हरिजन परिवारले गत पौष २३ गते लुम्बिनी अञ्चल अस्पतालमा पहिलो सन्तान प्राप्त गरेको थियो । तर, जन्मिएको आठ दिनमै छोरा हराएपछि हरिजन दम्पती अहिले गहिरो चिन्तामा छन् ।

शिशुका आमा बुवाले बच्चको खोजि गरिदिन प्रहरी प्रशासन लगायत सबैसँग गुहार मागेका छन् ।

यो विषयमा प्रहरीले अनुसन्धान थालेको बताए पनि अस्पतालमा खैलाबैला हुन बाहेक अन्य उपलब्धी हुन सकेको छैन ।