राहदानी बनाउन लाइन बस्नै नपर्ने
पुस २३ । राहदानी बनाउनका लागि घण्टौंसम्म बस्नुपर्ने लाइनको झन्झट हट्ने भएको छ ।
राहदानी विभागले अनलाइनबाटै समय लिएर फारम बुझाउने अनि राहदानी लिने मिति र सयम लिनुपर्ने नयाँ व्यवस्था लागू गर्न लागेको हो ।
विभागले राहदानीका लागि आवेदन फारम बुझाउन ‘अनलाइन’ बाट समय लिनुपर्ने व्यवस्था एक महिनाभित्रै गर्न लागेको अन्नपूर्णमा खबर छ ।
राहदानी विभागका महानिर्देशक रमेश खनालका अनुसार अनलाइनबाट फारम भरेर बुझाउन मिति र समय लिनुपर्नेछ । ‘यस्तो व्यवस्था भएपछि नागरिकले राहदानी फारम बुझाउन र लिन लाममा बस्नुपर्ने छैन्,’ उनले भने, ‘यो योजना माघ भित्रैमा लागू हुनेछ ।’
अनलाइनबाट समय लिएपछि मात्र विभागमा गएर फारम बुझाउन सकिनेछ । फारम बुझाएपछि विभागले तोकेको दिन र समयमा राहदानी प्रदान गर्नेछ । नयाँ व्यवस्था लागू भएपछि विभागमा अहिले राहदानीका लागि फारम बुझाउन र लिन लाग्ने गरेको भीड अन्त्य हुनेछ ।
प्रकाशित मिति:
January 07, 2014
