काठमाडौं प्रहरी प्रमुख खरेललाई भेट्न गएका डन सिँधै जेलमा
माघ २६ । काठमाडौं प्रहरी प्रमुख एसएसपी रमेश खरेललाई भेटेर नजिक हुन पुगेका एक युवक उल्टै जेलमा कोचिनु परेको छ ।खरेलको कार्याकक्षमा बिहीबार साँझ एक युवक ‘दाई नमस्ते’ भन्दै प्रवेश गरे । सर्वसाधारणलाई सहज भेट दिने खरेल ती व्यक्तिसँग भने आक्रोशित भए । आदेश दिए, ‘यो किन आयो यहाँ, लगेर थुन ।’ एसएसपी खरेलसँग भेटेर सम्बन्ध बनाएर नजिक हुन हनुमानढोका परिसर पुगेका बलराम सापकोटा ‘बले’ प्रहरी खोरमा परेका हुन् । क्यासिनो किङका नामले चिनिने उनी प्रहरी अधिकारीहरुलाई समेत आर्थिक प्रभावमा पारी क्यासिनोमा करोडौ रुपैयाँ कमाउन सफल व्यक्ति हुन् ।
रातारात करोडपति बनेका उनीमाथि सम्पत्ति शुद्धीकरण अनुसन्धान विभाग तथा नेपाल पैहरीको केन्द्रीय अनुसन्धान व्युरो (सिआइबी०ले समेत छानबिन गरिरहेको छ । राजधानीमा गुन्डागर्दीमा सक्रियविरुद्ध खरेल आक्रामक रुपमा प्रस्तुत भएपछि सापकोटा खरेलसँग निकट बन्न बेलुका करिब सात बजेदेखि भेट्न पुगेका थिए । गुन्डा, दलाल र पटाहाहरुसँग संगत नै नगुर्न बिहीबारै मातहतका प्रहरीलाई निर्देशन दिएका खरेलले क्यासिनोमा बदनाम व्यक्ति आफूलाई भेट्न आएपछि पक्राउ गरेको हुनमानढोका प्रहरी स्रोतले बताएको नयाँ पत्रिकामा नवराज मैनालीले समाचार लेखेका छन् ।
प्रहरीले शुक्रबारै सापकोटालाई केही सार्वजनिक अपराध मुद्दामा अदालतबाट म्याद थप गरिसकेको छ । खरेल अघिल्लोपटक काठमाडौं परिसरको प्रमुख हुँदा पनि बले पक्राउ परेका थिए । सामान्य आर्थिक अवस्था भएका बले क्यासिनो बाउन्सर हुँदै चर्को व्याजमा पैसा लगानी गरेर रातारात करोडपति बनेका हुन् । पछिल्लो समय उनले रोयल र एभरेस्ट क्यासिनोमा टेबुल भाडामा लिएर जुवा खेलाउँदै आएका छन् । क्यासिनो अपराधी जन्माउने अखडा बन्दै गएको भन्दै क्यासिनोमा नेपाली प्रवेशलाई शून्य बनाउने खरेलको योजना छ ।
प्रकाशित मिति:
February 09, 2014
