रिडी हाइड्रोपावरको ११ लाख कित्ता सेयर सर्वसाधरणका लागि आउने निश्चित

काठमाडौं, माघ । अरुणभ्याली हाइड्रेपावर कम्पनी र रायराइ हाइड्रोपावर डेभलपमेन्ट कम्पनी समूहकै रिडी हाइड्रोपावर डेभलपमेन्ट कम्पनीले सर्वसाधरणका लागि  ११ लाख कित्ता सेयर निष्कासन गर्ने भएको छ ।

 कम्पनीले सोमबार नेपाल धितोपत्र बोर्डबाट ११ लाख कित्ता सेयर निष्कासनको अनुमति पाएको छ ।

यसरी अनुमति पाएको चाँडोमा १५ दिन ढिलोमा दुई महिनाभित्र धितोपत्र निष्कासन गर्नुपर्ने नियम रहेको छ । 

कम्पनीले रिडी खोला जलविद्युत् आयोजना निर्माणको सेयर जारी गर्न लागेको हो । कम्पनीले २०६९/७० मा दुई करोड १२ लाख नाफा कमाएको थियो । कम्पनीले छ करोड ४० लाख रुपैयाँ बिद्युत् बिक्रीबाट आम्दानी गरेको थियो । कम्पनीको पिलुवा खोला जलविद्युत् आयोजना र रिडीखेला साना जलबिद्युत् आयोजना सञ्चालनमा रहेको छ ।

सर्वसाधारणलाई निष्कासन गर्न लागेको सेयरको अंकित मूल्य एक सय रुपैयाँ रहेको छ । यो सेयर निष्कासन पछि कम्पनीको चुक्तापूँजी तीस करोड रुपैयाँ पुग्ने छ ।

कम्पनीले असोजको पहिलो साता नै स्थानिय तथा आयोजनाबाट प्रभावित क्षेत्रका बासिन्दाको लागि तीन लाख कित्ता सेयर जारी गरिसकेको छ ।