उपप्रधानमन्त्रीहरु विमानस्थलमा तानातान र ठेलाठेल, मर्यादा बरियतामा देखाए गाइजात्रा
काठमाडौं १६ चैत
वर्तमान सरकारमा राप्रपाबाट कमल थापालाई उपप्रधान तथा संघीय मामिला तथा स्थानीय विकास मन्त्रीका रुपमा भित्र्याएसँगै प्रधानमन्त्रीपछि दोस्रो बरियतामा को हुने भन्ने विषयमा विवाद चर्केर गएको छ ।
नेपाली कांग्रेसबाट सरकारको नेतृत्व गर्दै गृहसहित विमलेन्द्र निधिले उपप्रधान मन्त्रालय सम्हालेका छन् । सरकारको नेतृत्व गरिरहेको नेकपा माओवादी केन्द्रबाट पनि अर्थसहित कृष्णबहादुर महरा उपप्रधान मन्त्री छन् । तर, निधि यसअघि प्रधानमन्त्रीपछि दोस्रो बरियतामा थिए । थापा सरकारमा आएपछि निधि र थापाबिच बरियता विवाद चर्किएर गएको छ ।
प्रधानमन्त्री पुष्पकमल दाहाल प्रचण्ड साताव्यापी चीन भ्रमणबाट स्वदेश फर्कने क्रममा बुधवार त्रिभुवन अन्तराष्ट्रिय विमानस्थलमा उपप्रधानमन्त्रीद्वय विमलेन्द्र निधि र कमल थापाको बरियता विवाद सतहमै देखिएको छ ।
प्रधानमन्त्रीलाई स्वागत गर्न सभामुख ओनसरी घर्ती सुरुमा लाइनमा बसेकी थिइन् । त्यसपछि थापा अरु कसैलाई वास्तै नगरी लाइनमा बसे । तर निधीलाई त्यो कुरा मन नपरेपछि असन्तुष्टि जनाउँदै उनले महरालाई तानेर ल्याएर थापापछि राख्छन् । महरालाई अप्ठ्यारो लागेपछि उनले निधिलाई नै समातेर थापापछि राखेर आफू पहिला बसेकै ठाउँमा पुग्छन् । तर, निधिले पुनः तानेर उनलाई थापापछि बसाल्छन् । तानातानपछि महरा सरमराउँदै थापापछि प्रधानमन्त्रीलाई स्वागत गर्न बस्छन् भने थापाको रिसले निधी महरापछि बस्छन् । यो तमासा विमानस्थलमा पुगेका अरु सबैले देख्ने त भए नै, सभामुख घर्तीले पनि फर्की फर्की हेरेकी थिइन् ।
घटना यतिमै सकिदैन, प्रधानमन्त्री प्रचण्डलाई स्वागत गरेपछि निधि विमानस्थलको अतिविशिष्ट कक्षसम्म पुगे र पत्रकार सम्मेलनमा प्रधानमन्त्रीसँग बस्दै नबसी निस्किए तर पत्रकार सम्मेलनमा प्रधानमन्त्री प्रचण्डसँग एकातिर थापा र अर्कातिर प्रचण्ड पत्नी सिता दाहाल बसिन् ।
यसअघि चीन जाने क्रममा पनि मर्यादाक्रम विवादका कारण प्रधानमन्त्री प्रचण्डले तीन जना उपप्रधानमन्त्री मध्ये कसैलाई पनि कार्यवाहक प्रधानमन्त्रीको जिम्मेवारी दिएका थिएनन् । (सबै फोटो अन्नपूर्णपोष्टबाट साभार)
प्रकाशित मिति:
March 29, 2017