Hot Issue » असार १ गते नयाँ पार्टी जन्मन्छ, क्रान्ति सफल बनाउन हतियार उठाउन पनि तयार हुनुपर्छ : वैद्य

एकीकृत नेकपा माओवादीका वरिष्ठ उपाध्यक्ष मोहन वैद्य किरणले असार १ गते नयाँ पार्टी जन्मिने बताएका छन् ।

हिमालय टेलिभिजनको ‘द आरडी शो’ का लागि पत्रकार ऋषि धमलासँग गरिएको कुराकानीमा उनले १ गते हुने राष्ट्रिय भेलाले नयाँ क्रान्तिकारी पार्टी जन्माउने उदघोष गरेका हुन् ।

सो क्रममा वैद्यले माओवादीको वर्तमान नेतृत्व र सोचबाट क्रान्ति पुरा हुन नसक्ने भएकाले नयाँ पार्टी आवश्यक रहेको बताएका छन् ।

वैद्यको भनाई छ अहिलेको पुरानो पार्टीले क्रान्ति हाँक्न सक्दैन । नयाँ क्रान्तिकारी विचारलाई अघि बढाउन र नेतृत्व गर्न पनि क्रान्तिकारी पार्टीको आवश्यकता छ ।

क्रान्तिलाई नयाँ उचाईमा पु¥याउन र मुलुकलाई नयाँ निकास दिन पनि भेला निर्णायक हुने उनले उल्लेख गरेका छन् ।

माओवादीको अहिलेको नेतृत्व पक्ष क्रान्तिकारी विचारबाट विचलीत भएको, यसले कम्युनिष्ट पार्टीको जनवादी नीति त्यागेको, जुझारु र शसक्त धार विर्सीसकेको वैद्यको आरोप छ  ।

दश वर्षे जनयुद्ध र संविधानसभाको निर्वाचनपछि अध्यक्ष प्रचण्ड र उपाध्यक्ष बाबुराम भट्टराइले क्रान्तिको लाईन परित्याग गरेर संघीय लोकतान्त्रीक गणतन्त्रमा आउनु नै ठूलो गल्ती भएको वैद्यले बताए । ‘हामी जन गणतन्त्रका कुरा गरीरहेका छौँ । जनगणतन्त्र बिना निकास सम्भव छैन’, वैद्यले भने, ‘प्रचण्डजीले यो मुल लाईनमा धोका दिईरहनुभएको छ । अब प्रचण्डपथ असफल भयो । यस बारेमा राष्ट्रिय भेलामा छलफल हुनेछ ।’

अध्यक्ष प्रचण्ड असफल भएको शान्ति, र संवधान केही दिन नसकेको र जनमुक्ती सेनालाई सेना मातहत बुझाएको वैद्यको आरोप थियो । ‘उनीहरुले कम्युनिष्ट विचार, मर्म र बर्गीय चरीत्रविपरीत सुकुम्बासीलाई लखेटनु भयो, सकुम्वासीको घर ध्वस्त पारे । पुजीवादी शक्तिसँग सम्झौता गरे’, वैद्यले भने, ‘यसमा सुधार नगरेसम्म सँगै जान सकिन्न । यथास्थितिमा सँगै जान सकीन्न ।’

प्रचण्डको नीति असफल भएकाले उनले नेतृत्व पनि छोडनुपर्ने वैद्यको जिकिर थियो । ‘तर हाम्रो लडाइ पदको लागि होईन, सैध्दान्तीक हो । उहाँहरु सिध्दान्तमा विचलीत भएकाले हामीले सैध्दान्तीक लडाई लडनु परेको हो’, वैद्यले भने । परि आयो भने क्रान्तिको नेतृत्व लिन आफु तयार भएको बताउँदै वैद्यले भने, ‘तर प्रचण्ड र बाबुरामजीस“गको हाम्रो लडाईलाई पदको बार्गेनिङका रुपमा नबुझन आग्रह गर्दछु ।’

माओवादी अध्यक्ष प्रचण्डस“ग अहिले पनि आफनो संवाद भने भईनै रहेको वैद्यले ‘आरडी शोमा’ खुलाए । ‘धमलाजी, प्रचण्डजीस“ग मेरा कुरा भईरहेको छ । अस्ती पनि टेलिफोनमा कुरा भएकै हो’, वैद्यले भने, ‘मैले प्रचण्डजीलाई हरेक पटक भनेको छु, उनले पहिले आत्मालोचना गर्नुपर्छ । उहा“को नीति असफल भयो । नयाँ नीतिमा जान तयार हुनुपर्छ । उनले नयाँ जनवादी नीति अंगीकार गर्नुपर्छ ।’

प्रचण्डले पद छाडन र छलफलबाट आफुमा सुधार ल्याउन तयार भएको बताए पनि त्यसमा विश्वास गर्ने ठाउँ भने नरहेको वैद्यले बताए । ‘अब प्रचण्डजीले बोलेर मात्र हुदैन, उहाँका कुरा र आश्वासन त हामीले धेरै सुन्यौं । अब क्रान्तिको पक्षमा प्रतिबध्दतासहित कार्यान्वयन गर्न सक्नुपर्छ । त्यसो भयो भने मात्र सहयात्रा गरेर जान सकिन्छ । अझै पनि ठाउँ छ, प्रचण्डका लागि’, वैद्यले भने ।

प्रधानमन्त्री बाबुराम भट्टराईका बारेमा चर्चा नै नगर्न वैद्यले आग्रह गरे । ‘बाबुरामजीको कुरै नगर्नुस । उहाँ काम चलाउ हो । अब उहाँ हटनुपर्छ । म उहाँलाई प्रधानमन्त्रीका रुपमा पनि लिन्न’, वैद्यले भने ।

अब सबै दल मिलेर राष्ट्रिय सहमतीबाटै निकास खोज्नुपर्ने वैद्यको सुझाव थियो । ‘अब सर्वपक्षीय गोलमेच सभा नै निकासको प्रस्थानविन्दु हो । अहिले संविधानसभाको निर्वाचन हुन पनि सक्दैन । संविधासभा पुनस्थापना गरेर काम पनि छैन । किनकी संविधानसभाले चार वर्षमा केही काम गरेन’, वैद्यले भने । गोलमेच सभाबाटै अन्तरीम सरकार बनाउनुपर्ने उनको सुझाव थियो ।

नेपाली काग्रेस र एमालेको एजेण्डामा आफुहरुको असहमती रहेको वैद्यले स्पष्ट पारे । ‘प्रधानमन्त्री हटाउने कुरामा उहा“हरुस“ग सहमती भए पनि अरु कुरामा मिल्दैन’, वैद्यले भने ।

एक प्रश्नको उत्तरमा बैद्यले जनवादी क्रान्तिका लागि परेमा जनविद्रोहमा गई हतियार उठाउनसमेत पछी नपर्ने बताए । ‘जनविद्रोहमा पनि जन्छौ हतियार पनि उठाउछौं’, वेद्यले भने, ‘क्रान्ति पुरा गर्न कुनै कसर बाँकी राख्दैनौं । किनकी सात सालमा कांग्रेसले हतियार उठाएकै हो । झापा विद्रोहमा एमालेले हतियार उठाएकै हो । क्रान्ति सफल बनाउन हतियार उठाउन पनि तयार हुनुपर्छ ।’

प्रकाशित मिति: June 09, 2012