पुस १० – राष्ट्रपति डा रामवरण यादवलाई बनारस हिन्दू विश्वविद्यालय (बिएचयु)ले ‘डक्टर अफ ल’को मानार्थ उपाधि प्रदान गरेको छ ।
राष्ट्रपति यादवलाई बनारसस्थित उक्त विश्वविद्यालयमा आज आयोजित विशेष समारोहमा बिएचयुका कुलाधिपति करण सिंहले उक्त उपाधि प्रदान गरेका हुन् ।
उपाधि ग्रहणपछि सङ्क्षिप्त मन्तव्य व्यक्त गर्दै राष्ट्रपति डा यादवले आफूलाई दिइएको उक्त उपाधिबाट नेपाल र नेपालीको सम्मान एवम् गौरव बढेको बताएको राससमा उल्लेख छ । उनले आफूलाई गरिएको सम्मानबाट शताब्दीऔंँदेखिको नेपाल– भारतबीचको प्रगाढ सम्बन्धमा नयाँ आयाम थपिएको पनि धारणा व्यक्त गरेका छन् ।
भारतीय राष्ट्रपति प्रणव मुखर्जीले बनारस नेपाल र भारतका विद्वान्को सङ्गमस्थल भएको उल्लेख गर्दै धेरै नेपालीले बनारसमा अध्ययन गरेको स्मरण पनि गरे ।
राष्ट्रपति डा यादव आजै बनारसबाट नयाँदिल्लीतर्फ प्रस्थान गरेका छन् ।
