गोली नै हानेर २० लाख लुटियो
पुस २५, रासस – महोत्तरीको पडौला बजारमा बुधबार दिउँसो एक हतियारधारी समूहले गोली प्रहार गरी एक व्यक्तिबाट रु २० लाख लुटेको छ ।
जनकपुरबाट पैसा लिएर बेलबा सरपल्लो जाँदै गरेका राजदेव चौधरीलाई आज दिउँसो २ बजे बीच बाटोमा पर्ने पडौला बजारमा अपरिचित व्यक्तिहरूले गोली हानी रु २० लाख लुटेर भागेको जिल्ला प्रहरी कार्यालय महोत्तरीले जनाएको छ ।
जिल्लाको सरपल्लोमा आइएमइ सञ्चालन गर्दैआएका राजदेव चौधरीलाई नकावधारीले पडौला बजारमा रोकेर दाहिने खुट्टामा गोली हानेको र पैसा लुटी भागेको प्रहरी निरीक्षक सुजन खड्काले बताए ।
लुटेराहरूको खोजीका लागि अहिले त्यस क्षेत्रमा व्यापक प्रहरी परिचालन गरिएको छ ।
प्रकाशित मिति:
January 10, 2013
