पुस २५ रासस – धनुषा जिल्लाका गाविस सचिव र नगर सचिवहरुले सेवाग्राहीसँग भोजभतेरका नाममा अतिरिक्त रकम लिने गरेको तथ्य खुलासा भएको छ ।
सेवाग्राहीको गुनासोअनुसार नक्सापासलगायत विभिन्न आवेदनको सिफारिसका नाममा सचिवहरूले अतिरिक्त रकम लिने गरेका छन् । सचिवले ‘जोसँग पैसा छ उसैको काम गर्ने’ भनी सेवाग्राहीलाई अतिरिक्त रकम दिन बाध्य पार्ने गरेको स्थानीय सेवाग्राही सन्तोष साह बताउँछन् ।
अतिरिक्त रकम नदिएमा सचिवहरूले सेवाग्राहीलाई महिनौँसम्म कार्यालय धाउन बाध्य बनाउने र विभिन्न समस्या उत्पन्न गर्ने गरेको पनि उनले जानकारी दिए ।
गौ संरक्षण मञ्चका अध्यक्ष जगदिश महासेठले नगर सचिव र गाविस सचिवले सिफारिस गरेर सेवाग्राहीसँग दुईहजारदेखि चार हजार रुपैयाँसम्म अतिरिक्त रकम लिने गरेको बताउँछन् ।
मञ्चले पटकपटक सम्बन्धित निकायका प्रमुखलाई यसबारे जानकारी गराउँदा पनि कुनै पहल नभएकामा दुःखेसोसमेत गरे ।
