माघ ३ – शुक्रबार देशका विभिन्न स्थानमा पानी पर्ने मौसम पूर्वानुमान महाशाखाले अनुमान गरेको छ ।
महाशाखाले काठमाडौँ उपत्यकालगायत मुलुकका विभिन्न स्थानमा यही माघ ५ गते शुक्रबार पानी पर्ने सङ्केत देखिएको जनाएको हो ।
वायुमण्डलमा प्रवाह हुने हावाको गतिमा परिवर्तन आएकाले दुई तीन दिनसम्ममा पानी पर्ने सङ्केत देखिएको हो । त्यसैगरी केही दिनदेखि देशका विभिन्न स्थानमा बिगँ्रदै गएको मौसममा भने क्रमिक सुधार हुँदै गएको छ । मुलुकको पहाडी क्षेत्रमा घाम लागेको र तराई क्षेत्रमा लागेको हुस्सु हटेर सुधार हुँदैगएको छ ।
महाशाखाका वरिष्ठ मौसमविद् राजेन्द्र श्रेष्ठले अहिले मुलुकको सुदूरपश्चिमी क्षेत्रबाट पानी पर्ने सङ्केत देखापर्दै गएकाले त्यसको असरले शुक्रबारसम्म काठमाडौँ उपत्यकामा पानी पर्ने र केही दिन चिसोमा वृद्धि भई त्यसपछि क्रमिक सुधार हुँदै जाने बताएका छन् ।
गत साता काठमाडौँ उपत्यकामा ‘माइनस’(ऋणात्मक) दुई डिग्रीसम्म तापक्रम घटी बढ्ता चिसोको अनुभव भएको थियो । पाँच वर्षपछि उपत्यकाको तापक्रम ऋणात्मक भएको महाशाखा अभिलेखले देखाएको छ ।
