प्रहरीको मोष्ट वान्टेड सुचिका एमाओवादी सभासद्लाई सर्वोच्चले डाक्यो
काठमाडौ, १५ माघ । सर्वोच्च अदालतले नेपाल प्रहरीको मोष्ट वान्टेड सुचिमा रहेका एमाओबादी सभासद् लालेन्द्र मण्डललाई अदालतमा उपस्थित हुन आदेश दिएको छ । बुधबार सर्वोच्चले आफै वा कानुन ब्यवसायी मार्फत उपस्थित हुन मण्डललाई आदेश दिएको सर्वोच्चका सह प्रवक्ता बाबुराम दाहालले बताए ।१६ भदौ २०६९ मा महोत्तरीका रामविलास मण्डलको हत्या अभियोग लागेका मण्डल प्रहरीको सुचिमा फरार अभियुक्त हुन । सिंचाई सम्बन्धी सामन्य बिबादमा लालेन्द्र, गणौरा मण्डल, रामपदारथ मण्डल र चन्द्रश्वर मण्डलले रामविलासको हत्या गरेको अभियोगमा महोत्तरी जिल्ला अदालतले बारेष्ट जारि गरेको थियो । १५ माघ २०६९ मा जिल्ला अदालतले वारेष्ट जारि गरेपछि मण्डल फरार रहेका थिए । फरार अवस्थामै एनेकपा माओबादीले सामानुपातिक सभासद् बनाएपछि उनीबिरुद्ध सर्वोच्च अदालतमा रिट दायर भएको थियो ।
अधिबक्ता दिनेश त्रिपाठीले हत्या अभियोग लागेका ब्यक्तिलाई सभासद् बनाउन नहुने र उनलाई पक्राउ गरि कानुन कार्वाहीको माग गर्दै ५ माघमा रिट दायर गरेका थिए । रिटमा सुनुवाई गर्दै सर्वोच्च अदालले उनलाई उपस्थित हुन आदेश दिएको हो । न्यायाधीश प्रकाश वस्तीको एकल इजलासले उनलाई पक्राउ गर्नु पर्ने हो या होइन उनको सभासद् पद कायम रहन सक्ने या नसक्ने बिषयमा छलफल गर्न अर्को साता उपस्थित हुन आदेश दिएको छ । त्रिपाठीले हत्या अभियुक्तलाई पक्राउ गर्न र सभासद् पद खारेज गर्न माग गर्दै रिट दायर गरेका थिए ।
रामविलासको हत्या गरेपछि उनकी श्रीमति चुनरिया मण्डलले किटानी जाहेर गरेकी थिइन । किटानी जाहेर भएदेखि फरार रहेका मण्डलबिरुद्ध प्रहरीले फरारी मुद्दा दायर गरेको थियो । अदालतले उनलाई उपस्थित हुन वारेन्ट जारि पनि गरेको थियो ।
प्रकाशित मिति:
January 29, 2014
