नदीमा हाम फालेकी महिलाको जीवितै उद्धार
मानसिक अवस्था ठीक नभएकी पूजा रोकाया नाम बताउने अन्दाजी २५ वर्षीया महिलाले आज दिउँसो दोदा नदीमा हाम फालेर आत्महत्या गर्ने प्रयास गरेकी थिइन् ।
महिलालाई नदीमा हाम फालेको देखेपछि नदीमा माछा मार्दै गरेका स्थानीयले महिलाको जिवितै उद्धार गरेका हुन् । उद्धार गर्नेहरुमा बेलौरी नगरपालिका–७ का जागुराम चौधरी र रामप्रसाद चौधरी रहेको इप्रका बेलौरीले जनाएको छ ।
उनीहरु नदीमै गएर रसीको माध्यमबाट ती महिलाको ज्यान जोगाउन सफल भएका हुन् । मानसिक अवस्था गुमाएकी ती महिलाका दुई सन्तानसमेत रहेका छन् । बर्दिया घर बताउने ती महिला गत चैत महिनादेखि बहिनीको घर बुटाबारीमा बस्दै आएकी थिइन् ।
यसैगरी, कञ्चनपुरको भीमदत्त नगरपालिका–६ ऐठपुरकी युवतीले आफँैलाई धारिलो वस्तु प्रहार गरी आत्महत्याको प्रयास गरेकी छिन् ।
ऐठपुरस्थित महाकाली सिँचाइ नहर नजिक डेरामा बस्ने ती युवतीले शुक्रबार राति कोठाभित्र हात, खुट्टा, पेट र घाँटीमा घारिलो वस्तु प्रहार गरी आत्महत्याको प्रयास गरेकी हुन् ।
प्रकाशित मिति:
September 14, 2014
