असोज १६ – बेरोजगार युवालाई स्वरोजगार बन्न उत्प्रेरणा पुर्याउने उद्देश्य राखेर डेन्टल सञ्चालक समेत सहभागी भई कञ्चनपुरमा बङ्गुर फार्म सुरु गरिएको छ ।
कञ्चनपुरको भीमदत्तनगर बजारमा रहेको हिमाल डेन्टलका निर्देशक रमेश चन्दले अधिकारकर्मी प्रविन बोगटी र पोषण पुनःस्थापन गृहका कर्मचारी मुकुन्दप्रसाद भट्टसँग मिलेर बङ्गुर फार्म सञ्चालन गरेका हुन् ।
सुडास्थित सिसैयाको चौधर नदीमा जमिन भाडामा लिएर पाँचजनाले बङ्गुर फार्म सञ्चालन गरेका हुन् ।
सञ्चालक चन्दले अहिले विदेश जाने युवाको सङ्ख्या दैनिक बढेको र यसलाई रोक्न र स्वरोजगारीका अवसर सिर्जना गर्न फार्म चलाएको बताए ।
फर्मका पाँचजनामा चार पुरुष र एक महिला छन् । भीमदत्त नगरपालिका वन गाउँकी गीता चन्दले बङ्गुरपालनमा साझेदारी गरेकी छिन् ।
खोरमा बङ्गुरका विभिन्न प्रजातिका ३० पाठा राखिएका छन् । एक पाठाको मूल्य रु ५०० भन्दा बढी परेको फर्म सञ्चालकहरूले बताए ।
अहिलेसम्म फर्म सञ्चालनका लागि रु छ लाख खर्च पुगेको प्रविनले भने— साना किसान सहकारीबाट रु एक लाख ५० हजार ऋणसमेत लिएको छ ।
जे होस, डेन्टल सञ्चालक तथा अधिकारकर्मीहरु समेत पशुपालन जस्ता पेसामा लागेपछि सर्वसाधरणलाई भने यसले थप काम गर्न उत्प्रेरणा जगाएको छ ।
