असार ३ । पर्सामा आज बिहान चटयाङ लागेर चारजनाको मृत्यु भएको छ ।

इलाका प्रहरी कार्यालय पोखरिया पर्साका अनुसार जिल्लाको बैरियाबिर्ता गाविसमा बिहान करिब ८ बजे चट्याङ खस्दा दुईजनाको घटनास्थलमा नै र दुईजनाको उपचारका लागि नारायणी उपक्षेत्रीय अस्पताल वीरगन्ज ल्याउँदै गर्दा मृत्यु भएको हो ।

बिहान खेतमा काम गरिरहेको अवस्थामा पानी परेपछि खेत नजिकैको छाप्रोमा ओत लागेर बसेका बेला अकस्मात चट्याङ खस्दा बैरियाबिर्ताका मनिफ मियाँ र गया मुखिया बिनको घटनास्थलमा नै मृत्युभएको स्थानीयवासी धर्मेन्द्र चौरसियाले जानकारी दिए ।

उक्त क्रममा गम्भीर घाइते भएका झौवागुठीका रामबावु राउत र बैरियाबिर्ताका शम्भु राउत कुर्मीको भने उपचारका लागि नारायणी अस्पताल वीरगन्ज ल्याउँदै गर्दा मृत्युभएको नारायणी अस्पताल वीरगन्जको आकस्मिक कक्षले जानकारी दिएको छ ।

गम्भीर घाइते दुर्गा साह कानुसहित अर्को एकजनाको वीरगन्जमा नै उपचार भइरहेको जिल्ला प्रहरी कार्यालय पर्साले जनाएको छ । रासस

यसमा तपाईको प्रतिक्रिया