News » पैसाको नोटमा पृथ्वीनारायण शाहको तस्बिर राख्न माग

पुस १४ । नुवाकोटमा रुपैयाँ पैसाको नोटमा पृथ्वीनारायण शाहको तस्बिर राख्न माग गर्दै मन्त्री परिषदका अध्यक्षलाई ज्ञापन पत्र बुझाइएको छ ।

नागरिक मूल समारोह समिति नुवाकोटले जिल्ला प्रशासन कार्यालयमार्फत मन्त्रीपरिषदका अध्यक्ष खिलराज रेग्मीलाई पत्र पठाएर राष्ट्र निर्माता पृथ्वीनारायण शाहको तस्बिर अंकित नोट प्रचलनमा ल्याउन माग गरेको छ ।

ज्ञापन पत्रमा राष्ट्र पृथ्वीनारायण शाहको तस्बिर अंकित नोट प्रचलनमा ल्याउन र पुस २७ गतेलाई राष्ट्रिय एकता दिवस तथा पृथ्वी जयन्तीको रुपमा मनाउन र सार्वजनिक विदा दिन माग गरिएको छ ।

नेपाल राष्ट्रको निर्माता पृथ्वीनारायण शाह भएको उल्लेख गर्दै नेपाल देशलाई भिल्लहरुको देश नबनाउन र राष्ट्र निर्माता बडामहाराजाधिराजको सम्मानमा नेपाल राष्ट्रको एकताको गाठो कस्न पुस २७ लाई राष्ट्रिय पर्वको रुपमा हर्षोल्लासका साथ मनाउने परम्परा बहाल गर्न माग गरिएको छ ।

प्रकाशित मिति: December 29, 2013