एमाओवादीलाई जनताले सजाय दिए, तर अझैं पुगेको छैन : बादल

फागुन २१ काठमाडौं । नेकपा माओवादीका महासचिव रामबहादुर थापा बादलले क्रान्तिकारी शक्तिहरुबीचमा एकता अपरिहार्य रहेको बताएका छन् । एमाओवादीका मजदुर नेताहरुलाई बुधबार राजधानीमा पार्टी प्रवेश गराउदै महासचिव थापाले क्रान्तिकारी शक्तिहरु एकजुट हुनुपर्ने बताए ।

क्रान्तिकारी शक्तिहरुबीच एकता अपरिहार्य रहेपनि एमाओवादीसग भने एकता हुन नसक्ने समेत उनले बताएका छन् । एमाओवादीले धोका दिएका कारण पार्टी फुटेको भन्दै उनले अहिलेकै अवस्थामा पार्टी एकता सम्भव नभएको दाबी समेत गरे । क्रान्ति सफल नहुदै सफल भयो भनेर धोका दिएकै कारण पार्टी फुटेको हो, महासचिव थापाले पार्टी नेवा राज्य कुपण्डोलमा आयोजित कार्यक्रममा भने, धोका दिनेसग भावनात्मक रुपमा मात्र एकता हुन सक्दैन ।

क्रान्ति सफल नहुदै सफल भयो भनेर धोका दिएको एमाओवादी जनताले सजाय दिएको भए पनि धोका अनुसारको सजाय भने अझै नपुगेको समेत उल्लेख गरेका छन् । जनतालाई क्रान्ति पूरा भएको भ्रम छरेर एमाओवादीले धोका दिएकाले उनीहरुलाई अझै धेरै सजाय हुनुपर्ने पनि उनले जिकिर गरे ।

कार्यक्रममा एमाओवादीप्रति निक्कै आक्रमक देखिएका महासचिव थापाले एमाओवादी सच्चिने सम्भवना भने अझै जिवितै रहेको पनि उल्लेख गरे । हारेको सेनाले पराजयबाट पाठ सिकेर सुध्रन सक्छ महासचिव थापाले भने एमाओवादीले पनि आफूलाई सुधार्न सक्ने सम्भावना भने सकिएको छैन ।

महासचिव थापाले अहिलेको संविधानसभाबाट जनताको संविधान बन्नै नसक्ने ठोकुवा समेत गरेका छन् । यो संविधानसभामा प्रतिक्रान्तिकारी शक्तिहरु हावी भएको उनको भनाई छ ।

कार्यक्रममा थापाले यो संविधानसभार्फत २०४७ सालकै संविधान व्युताउने षड्यन्त्र भइरहेको आरोप पनि लगाएका छन् ।