एक महिलाले साधुलाई बुबा दाबी गरेपछि...
त्रिचालीस वर्षअघि घर छोडेर भारत लागेको बताउने सालकोट चमेरी खेतका नरबहादुर कामीलाई सोही गाविस–६ की सरस्वती भट्टराईले आफ्नो बुबा भएको दाबी गरेपछि जिल्ला प्रशासनमा दिनदिनै त्यही विषयमा छलफल हुने गरेको छ ।
ती महिला र साधुबीचको सम्बन्ध के हो भन्ने पत्ता नलागेपछि अन्ततः जिल्ला प्रशासन कार्यालयले डिएनए परीक्षण गराउन सुझाव दिएको छ ।
उनीहरुको नाता सम्बन्धबारे आइतबार भएको छलफलमा पनि टुङ्गो लाग्न नसकेपछि डिएनए परीक्षण गर्न सुझाव दिइएको प्रमुख जिल्ला अधिकारी दिलबहादुर घिमिरेले जानकारी दिए ।
साधु नरबहादुर सरस्वतीका बाबु हुन् की होइनन् भन्ने बयान दिन आइतबार महिलाकी आमालाई छलफलमा बोलाइएको र महिलाकी आमाले पनि आफ्नो पति नरबहादुरनै भएको बताएपछि समस्या जटिल बनेको प्रजिअ घिमिरेले बताए ।
दुवै पक्षले आ–आफ्नो अडान नछाडेपछि प्रशासनबाट डिएनए परीक्षणको लागि सिफारिस गर्ने निर्णय गरिएको हो । जिल्ला प्रशासन कार्यालयमा कुरा मिल्न नसकेपछि डिएनए परीक्षण गर्न दुवै पक्ष सहमत भएका छन् । महिलाले कामी थर बताउने ती साधु आफ्नो बुबा भएको भन्दै जिल्ला प्रशासन कार्यालयमा उजुरी नै दिएपछि साधुले तीन महिनादेखि नागरिकता पाउन सकेका छैनन् ।
गत फागुनमा नरबहादुर नागरिकता बनाउन भन्दै सुर्खेत आएपछि यो समस्या बाहिर आएको हो । नरबहादुर २०२८ सालमा सालकोटको चमेरीखेतबाट बेपत्ता भएका थिए । १६÷१७ वर्षको उमेरमै घर छोडेका कामी भारतको हरिद्वारमा सन्याशी बनेर बसेका थिए । गत फागुनमा नागरिकता बनाउन आएका उनलाई सरस्वतीले आफ्नो बाबु भएको दाबी गर्दै उनकै नामबाट आफ्नो नागरिकता बनाउने अड्डी कसेकी छिन् ।
सरस्वतीका बुबा रामप्रसाद शर्मा जिल्ला वन कार्यालय रुकुममा खरिदार पदमा कार्यरत थिए । १५ वर्ष अगाडि २०५६ साल वैशाख २९ गते उनी लखनऊमा उपचार गर्न गएको बेलादेखि नै बेपत्ता छन् ।
लामो समयदेखि बुबालाई खोजिरहेकी सरस्वतीले बेपत्ता बाबु हरिद्वारमा रहेको भन्ने खबर पाएपछि २०६८ माघ १६ गते आफू हरिद्वार पुगेको दाबी गरेकी छिन् । “म उहाँलाई भेट्न तीनपटक हरिद्वार पुगेपछि भेट भयो,” सरस्वतीले भनिन् – “उहाँ नै मेरो बुबा हो ।”
मानसरोवर जान नरबहादुरलाई नेपाली नागरिकता चाहिने भएपछि उनी नेपाल आएका थिए । सन्याशी बनेका नरबहादुरले सरस्वती आफ्नी छोरी नभएको बताउँदै आएका छन् । “म सालकोटमा छँदा विवाह गरें, त्यसपछि हरिद्वार गएर सन्याशी बनें,” उनले भने – “मेरा सन्तान छैनन्, म बाहुन होइन कामी हुँ ।” रासस
प्रकाशित मिति:
June 01, 2014
