नेपाल चीन सैन्य अभ्यासको औपचारिक घोषणा
काठमाडौं १५ पुस । उत्तरी छिमेकी राष्ट्र चीन र नेपालबीच सैन्य अभ्यासको घोषणा भएको छ । भारतले दुई देशबिच सैन्य अभ्यास हुने चर्चा चुलिएसँगै शंकास्पद तवरले हेर्न थालिरहेकै अवस्थामा चीनले दुई देशबिच सैन्य अभ्यास हुने सार्वजनिक गरेको हो ।दुई देशबीच सैन्य क्षेत्रमा सहयोग विस्तार गर्ने उद्देश्यले नेपाल र चीनबीच सन् २०१७ मा संयुक्त सैन्य तालिम नेपालमा आयोजना हुन लागेको हो ।
चिनियाँ रक्षा मन्त्रालयका प्रवक्ता याङ युजुनले बेइजिङमा आयोजित पत्रकारसम्मेलनमा सन् २०१७ मा नेपाल र चीनबीच संयुक्त सैन्य तालिमबारे प्रारम्भिक वार्ता भएको बताए । सैन्य तालिमको यकिन मिति उपयुक्त समयमा घोषणा गरिने उनले पत्रकार सम्मेलनमा बताएका थिए । नेपाल पक्षले भने चीनसँग सैन्य अभ्यास नभई तालिममात्र हुन लागेको बताउने गरेको छ ।
चीनको मिलेर अघि बढ्ने चासो
चीनले नेपालसँग रणनीतिक र सैन्य मामिलामा मिलेर काम गर्न सकिने बताउँदै आएको छ । गत जुनमा नेपाल भ्रमणमा आएका चिनियाँ जनमुक्ति सेनाका उपप्रमुख एड्मिरल सन जियागुओले तत्कालीन रक्षामन्त्री भीम रावलसँगको भेटमा नेपालसँग सैन्य क्षेत्रमा सहकार्य र सहयोग बढाउन इच्छुक रहेको बताएका थिए ।
भारत, अमेरिकासँग नेपालको सैन्य अभ्यास
नेपालले केही वर्षयता दक्षिणी छिमेकी भारत तथा अमेरिकासँग संयुक्त सैन्य अभ्यास गर्दै आएको थियो ।
अन्नपूर्ण दैनिकको समाचार अनुसार गत अक्टोबर ३१ देखि नोभेम्बर १३ सम्म रूपन्देहीमा नेपाल र भारतका सैनिकबीच सूर्यकिरण १० नामक सैन्य अभ्यास सम्पन्न भएको थियो । नेपाल-भारत सैन्य अभ्यास समापनमा भाग लिन भारतीय स्थल सेनाध्यक्ष दलवीर सिंह नेपाल आएका थिए ।
त्यसअघि नेपाल र अमेरिकाबीच सन् २०१५ नोभेम्बर ३ देखि १७ दिनसम्म काठमाडौंको छाउनी, पोखरा, लुक्ला र सगरमाथाको आधारशिविरमा संयुक्त सैन्य अभ्यास सम्पन्न भएका थिए ।
प्रकाशित मिति:
December 30, 2016
