जेठ ६ । यातायात व्यवस्था कार्यालयले सवारी चालक अनुमति पत्र (लाइसेन्स) को लागि लागू गरेको नयाँ परीक्षा प्रणाली आइतबारदेखि सुरु गरेको छ । यसअघि वैशाखको दोस्रो सातादेखि लाइसेन्सका लागि सुरु गरेको नयाँ ट्रायल परीक्षा सर्वोच्च अदालतको अन्तरिम आदेशपछि रोकिएको थियो ।
गत वैशाख २९ गते सर्वोच्चबाट नै अन्तरिम आदेश खारेज भएपछि यातायात कार्यालयले आजदेखि पुनः नयाँ ट्रायल व्यवस्था सुरु गरेको हो ।
सर्वोच्चको आदेशले फुकुवा भएपछि लाइसेन्स परीक्षासम्बन्धी नयाँ व्यवस्था आजैबाट लागू गरिएको बागमती अञ्चल यातायात व्यवस्था कार्यालयका लाइसेन्स शाखाका निमित्त प्रमुख राममणि पोखरेलले राससलाई जानकारी दिए ।
उनका अनुसार लाइसेन्सका लागि यसअघि नै आवेदन दर्ता गरेका स्कुटर र कारको आज ट्रायल परीक्षा भएको छ । निमित्त प्रमुख पोखरेलले लाइसेन्सका लागि हप्ताका छ दिन आलोपालो मिलाएर आवेदन दिन सकिने बताए ।
नयाँ व्यवस्थाअनुरूप ट्रली बस कार्यालय परिसरमा स्कुटर तथा बग्गीखानामा कारको ट्रायल परीक्षा हुनेछ । यातायात व्यवस्था कार्यालयका अनुसार स्कुटरको आवेदन हप्तामा एक दिन मात्रै दिन सकिनेछ ।
कार्यालयले आइतबार स्कुटर र गाडी, सोमबार र मङ्गलबार मोटरसाइकल र गाडी, बुधबार मोटरसाइकल, बिहीबार मोटरसाइकल र ठूलो गाडी, शुक्रबार मोटरसाइकल र सानो गाडीको मात्रै आवेदन दर्ता हुनेछ ।
आवेदन दिएको भोलिपल्ट लिखित र पर्सिपल्ट ट्रायल परीक्षा हुने कार्यालयले जनाएको छ ।
Powered by Blogger.
सर्वोच्चद्धारा रोकिएको लाइसेन्सको नयाँ परीक्षा प्रणाली सुरु
प्रकाशित मिति:
May 20, 2013
