News » अपमान सहन नसकेपछि शिक्षकको मृत्यु

  गुल्मी पुस ११। मृत अवस्थामा भेटिएका गुल्मी थोर्गाका एक शिक्षकको मृत्यु आफूले पढाउने छात्राले लगाएको दुव्र्यवहारको आरोप सहन नसकेपछि मदिरा सेवन गर्दा भएको अनुसन्धानबाट खुलेको छ । सोमबार राति विद्यालय नजिकै मृत अवस्थामा फेला परेका राष्ट्रिय माध्यमिक विद्यालय थोर्गाका विज्ञान शिक्षक निर्मल ज्ञवालीको मृत्यु अपमान सहन नसकेपछि गरेको मदिरा सेवनका कारण भएको प्रहरीले जनाएको छ ।

सोमबार दिउँसो कक्षा ७ मा अध्ययन गर्ने छात्राले आफूलाई शिक्षकले यौन दुव्र्यवहार गरेको आरोप लगाएकी थिइन् । छात्राले उक्त आरोप लगाएपछि सोमबार दिनभर विद्यालयमा तनाव सिर्जना भएको थियो । विद्यार्थीले त्यस्तो शिक्षकलाई कारबाही गर्न विद्यालय व्यवस्थापन समिति समक्ष माग गरेका थिए । आफूमाथि गलत आरोप लगाइएको भन्दै विद्यालयबाट बाहिरिएका शिक्षक ज्ञवालीले विद्यालय नजिकैको होटलमा ‘सिक्वेन्स’ नामक मदिरा दिउँसोदेखि नै सेवन गरेको र उच्च रक्तचापका समेत बिरामी भएकाले त्यसकै कारण उहाँको मृत्यु भएको देखिएको अनुसन्धानमा खटिएका जिल्ला प्रहरी कार्यालय गुल्मीका प्रहरी निरीक्षक निशान्त श्रीवास्तवले बताउनुभयो ।

शिक्षक ज्ञवालीको विद्यालय व्यवस्थापन समितिसँग समेत लामो समयदेखि विवाद हुँदै आएको थियो । होटल नजिकै मृत अवस्थामा फेला परेको र दिउँसो विद्यालयमा तनावसमेत सिर्जना भएकाले स्थानीयवासीले अरु नै आशङ्का गरेको भए पनि शव परीक्षणमा यस्तो कुनै समस्या नदेखिएको निमित्त प्रहरी प्रमुख राजेन्द्रप्रसाद श्रेष्ठले बताउनुभयो । स्रोतका अनुसार उहाँको दिमागमा अत्यधिक रगत जमेर मृत्यु भएको देखिएको छ । विज्ञान विषयमा स्नातकोत्तर ज्ञवालीले आठ वर्षदेखि विद्यालयमा अध्यापन गराउँदै आउनुभएको थियो । रासस

प्रकाशित मिति: December 26, 2013