प्रधानमन्त्रीकै अघिपछि हिड्थे ८८ किलो सुनका नाइके

काठमाडौं ३१ असोज

ठमेलमा फेला परेको तस्करीको ८८ किलो सुन तस्करीका नाइके मध्ये एक जना बेला बखत प्रधानमन्त्री शेरबहादुर देउवाकै अघिपछि हिड्ने गरेको पाइएको छ । 

प्रहरीको गहिरो अनुसन्धानपछि पक्राउ परेका मानबहादुर तामाङ प्रधानमन्त्रीसँग सम्पर्कमा मात्र नभएर कांग्रेसको समानुपातिकमा सिफारिस भएको समेत पाइएको छ । रसुवाको क्षेत्र नम्बर २ बाट कांग्रेसको समानुपातिक कोटामा उनी परेका थिए । टिकट फुत्काउन काठमाडौं आएका बेला भने प्रहरीले उनैलाई फुत्काउन सफल भएको हो ।

रसुवाको क्षेत्र नम्बर २ बाट कांग्रेसको समानुपातिक कोटामा पर्न काठमाडौं आएका उनी पार्टीले निर्वाचन आयोगमा उम्मेदवारको सूची बुझाएको भोलिपल्ट सोमबार पक्राउ परेका हुन् ।

काठमाडौंमा सुन कारोबारीको आवरणमा रहेका व्यवसायी, तामाङ र चिनियाँ नागरिक मिलेर तस्करी गर्ने गरेको र तामाङले केरुङ नाका कटाएर काठमाडौंसम्म ल्याउन सघाउने गरेको खुलेपछि प्रहरीले उनको खोजी गरेको थियो । उनी नेपाल–चीन–केरुङ व्यापार संघको अध्यक्ष समेत हुन् ।

केरुङ नाका, धादिङ र नुवाकोटको नाकाबाट सुन बोकेर सवारीसाधन सहजै कटाउने गरेको प्रहरी अनुसन्धानले देखाएको छ । काठमाडौंमा सुन बरामद भएसँगै चीन हिँडेका उनी अर्धभूमिगत पारामा उतै बसेका थिए । सुन पक्राउ परेपछि उनको सम्पर्क बालुवाटारसम्म भएको समेत प्रहरी अनुसन्धानले देखाएको बताइएको छ । त्यसो त उनी यसअघि पनि प्रधानमन्त्री रहेका कांग्रेस सभापति देउवासँग भेटघाटमा रहेका पाइएको छ ।