महावीर पुनलाई यस वर्षको ‘इन्टरनेट हल अफ फेम'

चैत्र २६ । ग्रामीण भेगमा विनातार इन्टरनेट नेटवर्क र सेवा विस्तारमा सक्रिय नेपालका महावीर पुन इन्टरनेट समाज नामक अन्तर्राष्ट्रिय संस्थाले प्रदान गर्ने यस वर्षको ‘इन्टरनेट हल अफ फेम’ मा परेका छन् ।

ग्रामिण भेगमा गरेको उनको कामको सम्मानमा यो वर्ष शिक्षासेवी तथा इन्टरनेट अनुसन्धानकर्ता पुनलाई हङकङमा आयोजित समारोहमा सम्मानित गरिएको समाचार संस्था एएफपीले जनाएको छ ।

उनको सो सेवा टेलिफोनसमेत नपुगेका एक सय ५० भन्दा बढी हिमाली गाउँमा समेत विस्तार भइसकेको छ ।

सम्मानित भएपछि पुनले आफू निःशुल्क इन्टरनेटको सशक्त वकालतकर्ता हुनुका साथै गरिबीको रेखामुनी रहेका जनताले यस्तो सेवा पाउन् भन्ने चाहना राख्दै आएको बताए ।